Vefumsjónarkerfi: WordPress, Shopify eða headless?

WordPress

WordPress keyrir stóran hluta allra vefja í heiminum. Það er ókeypis, sveigjanlegt og það er auðvelt að finna fólk sem kann á það. Með WooCommerce verður það líka netverslun.

Gallinn er að gæðin ráðast alfarið af því hvernig það er sett upp. Hver viðbót bætir við kóða sem hleðst á síðunum, og uppfærslur og öryggi eru á þína ábyrgð. Vel uppsettur WordPress vefur er góður, illa uppsettur er hægur og viðkvæmur.

Shopify

Shopify er hannað fyrir netverslun og það sést. Hýsing og öryggi eru innifalin og það er auðvelt að byrja. Það hentar vel verslun sem vill selja án þess að hugsa um tæknina.

Á móti kemur mánaðargjald, og margir eiginleikar koma úr aukaforritum sem kosta líka mánaðarlega. Athugaðu áður en þú velur hvort greiðslugáttin og sendingarlausnin sem þú vilt nota á Íslandi tengjast Shopify.

Wix og Squarespace

Fljótlegasta leiðin til að koma upp vef og allt er innifalið. Hentar vel fyrir einfaldan vef sem breytist sjaldan. Gallinn er að þú átt ekki vefinn heldur leigir hann, og það er erfitt að flytja hann annað seinna án þess að byrja upp á nýtt.

Headless: kerfið og vefurinn aðskilin

Í headless uppsetningu heldur þú vefumsjónarkerfinu, til dæmis WordPress eða Shopify, til að breyta efninu, en vefurinn sem gestir sjá er smíðaður sérstaklega og sækir efnið þaðan. Þú vinnur í sama kerfi og áður, en vefurinn verður mun hraðari og öruggari, því gestirnir koma aldrei nálægt kerfinu sjálfu.

Gallinn er að breytingar á útlitinu kalla á forritara, og upphafskostnaðurinn er hærri. Það borgar sig þegar vefurinn selur eða bókar og hraðinn skilar sér í tekjum.

Hvernig þú velur

Svaraðu fjórum spurningum. Hver á að uppfæra vefinn á hverjum degi og á hvað kann sá aðili þegar? Selurðu vörur eða tekurðu bókanir á vefnum? Skiptir Google máli fyrir reksturinn? Og ætlarðu að eiga vefinn í fimm ár eða eitt? Svörin velja kerfið nánast sjálf.